UK PM in WhatsApp, iMessage khap a rawt

United Kingdom (UK) Prime Minister David Cameron chuan surveillance plan a duanah, online messaging service, code hman theihna ang chite khap a rawt. Heng zingah hian WhatsApp leh iMessage te pawh an tel a ni.

Cameron chuan online messaging service hmanga midang hnena message thawntu nihna dik tak hriatchian theih a nih ṭhin loh avangin dan kengkawhtute tan pawh harsatna a siam a, firfiaka chetna leh pawikhawihna dang chhuina kawngah pawh harsatna a siam a ni, a ti.

PM hian apps khap a rawt te hi a hminghmerhin sawilang lo mah se, code hman theihna apps zingah hian WhatsApp, iMessage, Google Hangouts, Microsoft's Skype, CryptoCat leh a dangte a tel.

Cameron chuan, "Kan ramah hian kan chhiar thiam leh hriat thiam loh hmanga mipuite inbiakpawhna tur siam hi kan duh lo a ni. Sorkarin a tihtur hmasa ber chu kan ram leh kan mipuite venhim a ni," tiin a sawi. Hmei rual hian heng apps-te hi mipuite'n an download theih lohna tura dan siam dan tur erawh a la sawi lang lo.