John Kerry-a'n Pakistan a tlawh

US Secretary of State John Kerry chuan nimin khan Pakistan a tlawh a, a thlen ni hian Pakistan sorkar chuan thi tura thiam loh a lo chantir tawh, firfiak pasarih a khaihlum.

Official-te chuan mi pasarih te hi jail pali-ah venhimna khauh tak hnuaia khaihlum an ni tih an sawi a, an zingah hian kum 2003-a Karchi-a US consulate bei a, police pahnih thattu Zulfiqar Ali pawh a tel.

John Kerry chuan nimin zing khan Islamabad thlengin, Pakistan Prime Minister Nawaz Sharif-a adviser, Sartaj Azizi nen national security leh foreign affairs chungchangah joint press conference an nei nghal a, Pakistan PM chu boruak muanawm a awm theihna tura India thawhpui turin a ngen.

Sartaj Aziz chuan Kashmir chungchanga India nena inbiakna neih chu an agenda-ah a tel lo tih sawiin, nikuma meeting neih tura rawt lawk tawh India-in a ṭhulh san avangin India chuan Kashmir buaina chungchanga inbiak­na neih tak tak chu a duh lo a ni, a ti. "Kashmir tello chuan Pakistan-in India chu inbiakna neihpui a tum lo," tiin a sawi.

Kerry chuan, Pakistan mipuiten firfiaka chetna an dona kawngah theihtawpin US-in a thlawp chhunzawm zel dawn tih a sawi a, Pakistan rama inkhuar firfiak pawl ṭhenkhat chu Pakistan ram tan chauh ni lo, an ṭhenawm ramte tan pawh an la hlauh­awm a ni, a ti. Hei vang hian Pakistan sorkar chu a ram chhunga firfiak pawl hrang hrangte nuaibo tura a thawh a ngaih thu pawh US chuan chiang takin a lo hrilh tawh a ni tih a sawi bawk.

Aziz pawhin Peshawar-a Army school beih a nih chungchang sawichhuakin, sorkar chuan thlei bik nei loin an rama firfiak pawl hrang hrangte lakah beihpui a thlak zel tur thu a sawi.