Germany-a Muslimte kawngzawhah Merkel leh minister-te an tel

Berlin, Germany-ah Thawhlehni khan Muslim pawl huaihawtin firfiaka chetna duh lohna lantirna leh, sakhaw pawl hrang hrangte inkara inpawhna ṭha a awm duhna lantirin kawng zawh a ni a, Germany rama politician pawimawhte'n an telpui.

Berlin-a Brandenburg Gate aṭanga kawngzawh huaihawtah hian mi tel an tam hle. He kawngzawh hi Germany-a Muslim organization leh Turkish community group-te'n kar kalta-a Paris-a inthahna rapthlak tak thleng vanga an huaihawt a ni.

Germany President Joachim Gauck, Chancellor Angela Merkel leh a cabinet member-te pawhin kawngzawh hi an telpui a, anni bakah hian mi pawimawh tam tak an tel bawk.

President Gauck chuan thu sawiin, "Kan vai hian Germany kan ni," tiin, eng sakhua leh hnam pawh ni se, inpumkhatna leh democracy thlawp zel turin a chah. Hei bakah hian Germany rama Muslim-te'n Islam behchhana firfiaka chetna an duh lohzia an lantir chu lawmawm a tih thu a sawi.

German Council of Muslims hotu, Aiman Mazyek pawhin thu a sawi a, Paris khawpuia Charlie Hebdo magazine beih a nih chungchang sawiin, inthliarna leh tharum thawhna lantir chu eng kawng maha ngaihthiam theih a ni lo, a ti. "Firfiakte hian hnehna an chang lo a, an chang ngai bawk lo ang," a ti.

Muslim hruaitute bakah Kristian leh Jewish hruaitute pawhin thu an sawi a, thusawitute hian firfiakte chetna do let tura lungrual taka thawhho an duh thu an sawi.