Japan Cabinet-in budget atan dollar tld 814 a pawm

Japan Cabinet chuan April thla aṭanga inṭan tur, fiscal year 2015 chhunga sorkar budget atan US dollar tluklehdingawn 814 (yen trillion 96.34) a pawm. Social security leh defence lama an sum hman tam zel avangin budget pawh hi nasa takin a pung a ni.

Budget duan hi Prime Minister Shinzo Abe-a'n thuneihna a chan hnua a ṭum thumna a ni a, fiscal year kallai mek aiin budget hi yen trillion 95.88-in a tam a ni. Budget punna hi 2.8% a tling.

Defence budget chu 2.0% a pungin, yen trillion 4.98 dah a ni a, defence budget hi a zawnin kum thum chhung tihpun a ni tawh. PM Abe hian defence lam tihchak hi a dah pawimawh hle. Defence budget hi an tihpun zel avangin kum 2016-ah chuan yen trillion 5 a tling tawh ang.

Defence Minister thar Gen Nakatani chuan Japan ram chhehvel thil awmdan ngaihtuahin defence budget tihpun zel hi a ṭul niin a sawi a, sum tam zawk hi patrol aircraft leh lawnglian leina atana hman tum a ni. A lei tum zingah hian maritime patrol aircraft 20, crossover aircraft panga leh stealth fighter paruk a tel. Hei bakah hian defence ministry chuan motor ṭha 30 leh early-warning aircraft lei a tum a, hei hian hmun hla tak ami lawnglian leh aircraft dang awmte a hre zung zung thei dawn a ni.

Japan leh China hian East China Sea-a thliar­kar pakhat chu a neitu zawk nih an inchuh a, he thliarkar hi Japan chuan Senkaku tiin a vuah a, China lamin Diaoyu tiin a vuah thung. Thliarkar hi Japan thunnunna hnuaiah a awm mek.

Minister chuan thliar­kar an inchuh bul, Japan ram tuipui chinah China lawnglian hmuh an ni fo tih a sawi a, hei bakah hian China hian fighter jet pawh a thlawhtir fo niin a sawi.

China pawh a defence budget nasa takin a tipung bawk a, defence lama a sum dah hi Japan budget let hnih leh a chanve zeta tam a ni.

Hetihlai hian khawvel ram hrang hrang zing­a defence budget lian ber chu US niin, nikum chhung khan defence lama a sum sen zat hi dollar tluklehdingawn 600 a tling a ni.