Mubarak-a eiruk thubuai ngaihtuah ṭha tura tih a ni

Egypt-a appeal court chuan an ram President aṭanga paihthlak tawh, Hosni Mubarak leh a fapa pahnihte laka eiruk thubuai siamsak chu ngaithuah ṭha turin a ti.

Appeals Court chuan court-in Mubarak leh a fapa-te eiruk thubuaia thiam loh chantir a, Mubarak-a kum thum tang tur leh a fapa pahnih- Alaa leh Gamal-te kum li tang tura a lo tih tawh chu a hnawl a, an thubuai hi ngaihtuah nawn leh a ni dawn.

Mubarak-a hi a thubuai dang, kum 2011-a amah duh lohna lantira nawrh huaihawtte beih let leh mi eng emaw zat an thihphah chungchanga thubuai siamsakah chuan thiam chantir a ni a, eiruk thubuaia thiam loh a chan vang chauh hian jail-ah a la tang. He thubuai hi ngaihtuah nawn a, thiam a chan chuan a zalen thei tawh ang.

Eiruk thubuai siamsakah Mubarak-a hi a rorel tawp lam khan state fund sum tam tham tak tichingpenah puh a ni. Sum hi presidential palace cheiṭhatna tura tih ni mah se, Mubarak-a hian an chhungkaw in cheiṭhatna atan a hmang zawk nia puh a ni. Mubarak leh a fapate hi thiam loh chantir an nih hian dollar maktaduai 2.9 (Egyptioan dollar maktaduai 21.1) chawi tura tih an nih bakah, state sumah dollar maktaduai 17.6 (Egyptian dollar maktaduai 125) chhung let tura tih an ni bawk. Mubarak chhungkua hian sorkar hnenah Egyptian dollar matkaduai 120 chu an pek kir tawh.