Paris-a office beituten ram pawn aṭangin sum leh ralthuam an dawng

France khawpui, Paris-a Charlie Hedbo magazine office beitu, firfiakte chuan ram pawn lam aṭangin sum leh ralthuam hmanga puihna an dawng.

Police-te chuan office beitu mi pahnihte'n ralthuam an hman hi ram pawn aṭanga thawn luh a nih thu an sawi a, thuneitute chuan ram hrang hrangah an thurualpui ni thei awmte an zawng mek tih an sawi. Bulgaria-ah rinhlelh pakhat hmuh thar a ni bawk.

France Prime Minister Manuel Valls chuan Parliament inkhawma thu a sawiah, Paris khawpuia pawikhawihna rapthlak tak thlen hnuah an ramah firfiaka chetna chu na zawka an beih let a ngai a ni, a ti. PM chuan "Englai mahin kan inthlahdah tur a ni lo, inven a ngai reng a ni," a ti.

Valls chuan, "France hian firfiaka chetna te, sakhaw beh­chhana pawikhawihna thlente hi a do tlat a ni. Islam sakhua hi a do lo a, Islam hming chhala firfiaka chetna hi a do a ni," a ti. Interior Minister chu ramchhung venhimna kalpui dan turah rawtna thar siam thuai turin a ti bawk.

France Police-te chuan Paris beitu firfiakte thurualpui mi dang paruk vel chu an la awm a an hriat thu an sawi a, an zingah hian pawikhawihtu mi pahnih zinga pakhat zawk nupui car khalhtu pawh a tel. Magazine office beih a nih bakah hian supermarket beihnaah Juda mite bitum an nih avangin, France sorkar chuan pawikhawihna thlen hlauhawm zualna hmunah venhim hna thawk turin spai 10,000 vel a dah. Venhim ngai zual nia hriat zingah hian Juda school leh synagogue te, mosque leh khualzinte tana hmun pawimawhte pawh a tel.