Inthlan chuh tura thlutlukna chu Biden-a'n a siam ang : Nancy Pelosi

US presidential debate-a a chetṭhat loh avangin Democrats presidential candidate, president ṭanglai Joe Biden chu inthlan chuh a tumna aṭanga inhnukdawk tura duhtu an tam hle. Mahse Nancy Pelosi chuan thutlukna chu President Biden-a kutah a awm tih a sawi.

House of representatives speaker hlui leh Democrats hruaitu langsar, Nancy Pelosi chuan inthlan a hnaih zel avangin Biden chuan thutlukna siam thuai se a duh tih a sawi. President inthlan chuh tawh lo tura Biden duhtu tam hle mah se Pelosi chuan amah ngeiin thutlukna siam se a duh tih a sawi a, ṭha a tih angin thutlukna siam turin a duh tih a sawi lang bawk. Pelosi chuan Biden chu "President ṭha tak a ni" a ti a, Democrats mi leh sate pawhin an lawmin an zah hle a ni, a ti bawk.

Biden-a'n inthlan chuh a tum thu a sawi hnua a ṭhianṭha leh an party, Democrats a hruaitu langsar takin Biden a thlawpna a lantir lo hian Democrats party chhungah Biden duh lohna a lian hle tih a lantir niin an sawi. US President hi inthlan chuh lo tura duhtu an tam hle a, heng zingah hian milarte bakah an party chhunga mi ngeite pawhin inhnukdawk mai se an duh tih an sawi a ni. President Biden erawh chuan inthlan chuh ngei a la tum thu leh, Pathian chauhin inthlan chuh lo turin a hmin thei ang tiin a lo sawi tawh a ni.

President inthlan neih tura Bidena khingpui tur, Donald Trump chuan Florida-a thu a sawinaah President Biden chu debate neihpui lehah a cho a, mahse kaihruaitu awm loa tih a duh thu a sawi tel bawk. Trump hian June 27 a debate an neihah, Biden chu a chet ṭhat loh vangin an party chhung amite ngei pawhin inthlan chuh turin an ringzo tawh lo tih sawiin, Democrats hruaitu langsar zingah Biden tlin zawh ring lo an awm nual niin a sawi.