China-in SCO thuam chak a duh

China chuan Shanghai Cooperation Organisation (SCO) chu khawthlang ramten khawvel inrelbawlna an thununna do let nan a ṭangkai dawna a hriat avangin he pawl an kaihhruai chhung hian SCO hnuaia ramten thawhhona ṭha zawk an neih theih nan hmalak a tum.

SCO hi Russia leh China-in kum 2001 a an din niin, ram venhim kawnga thawk ho tur leh sumdawnna chungchanga thawh ho dan tur sawiho nana an din a ni. Ram pahnihte bakah hian India, Pakistan leh Central Asia ram- Kazakhstan, Kyrgyz Republic, Tajikistan leh Uzbekistan an tel a ni. Ram tel zat hi nikum khan tihpun niin Iran chu SCO member-ah lakluh a ni a, kuminah Belarus chu lakluh a ni leh bawk. SCO a tel ramte hian President nihna an inchelh chhawk ṭhin a, China chuan tunah hian president nihna a chelh thar a, hemi chhung hian SCO chu thuam chaka, khawvel inrelbawlnaa khawthlang ramte thuneihna do let nana hman an duh a ni.

SCO ramte hi kar liam ta khan Khazakstan-ah summit neiin China president Xi Jinping chuan Russia leh SCO hnuaia an thawhpui ram dangte chu nghet lehzuala inthlawptawnpuiah a sawm. Summit-ah hian Russia leh Ukraine indo chungchangah thuchhuah engmah an siam lo a, Washington-a NATO summit erawhin hemi chungchang hi sawi langin Ukraine an thlawp thu an puang a ni. National Bureau of Asian Research mithiam, Bates Gill chuan US leh khawthlang ram kaihhruai khawvel inrelbawlnaah SCO chu duh thlan tur dang rawn chhawp chhuak thei turin a insiamrem mek nia a hriat thu a sawi.