Israel sipaiten Gaza City-a chengte insaseng turin hriattir

Israel sipaite chuan Gaza City-ah lehkha tam tak thlakin, khawpuia chengte chu hmun him lama insaseng turin a hriattir.

Lehkha an thlakah hian, 'Gaza City-a cheng zawng zawngte' tiin an ziak a, an khawpui chu indona hmun hlauhawm tak a la ni zel tih sawiin, chhim lamah insaseng turin an hriattir a, an kalna kawng turte pawh an kawhhmuh nghal bawk.

Hemi hma hian Israel sipaite chuan Hamas leh Islamic Jihad firfiakte lakah beihpui an thlakna aṭanga insawn chhuak tur hian vawi thum an lo hriattir tawh bawk. Israel sipaite hian Gaza City hi an bei ngawrh leh hle a, an beihpui thlaknaah hian UN Agency of Palestinain refugees headquarters-a hman ṭhin, an chhuahsan tak chhunga ralthuam eng emaw zat an hmu chhuak tih an sawi. Gaza hmun dangah pawh beihpui hi an la thlak chhunzawm reng bawk.

Hospital lamin Thawhlehnia US sipaiten Khan Younis area chhim lama sikul, indona hlaua tlanchhiaten tawmhimna atan an hman mek an beihnaah mi 29 an thi nia a tarlan chu Israel chuan an chhui chian tur thu a sawi. Gaza-a Hamas sorkar chuan he hmun beihnaa thi zinga a tam ber chu hmeichhia leh naupang niin a tarlang a ni.

Independent UN rights expert chuan Israel chu Gaza-a chengte ṭam tir tuma campaign-an kalpui leh, an chetdan chu insuatna niin a sawi. Hei hi UN-a Israel mission chuan chhang letin, panel member chu thu dik tawk lo thehdarh leh, Hamas ho thlawpah a puh let thung. Israel military hnuaia Gaza-a chhawmdawlna pek chungchang buaipuitu, GOGAT hotu Elad Goren chuan Kerem Shalom crossing aṭangin chawh rualin nitin Gaza-ah mipui mamawh phurtu truck 250 zel lut ang a ni tih a sawi.

October 7, 2023-a Hamas-ten Israel chhim lam an beih thut avanga Israel-in Hamas laka indo puang a, Gaza Strip a beihnaah hian mi 38,295 vel an thi tawh nia sawi a ni a, thi zinga a tam zawk hi civil mi nia sawi a ni bawk.