Al-Qaida-ten Charlie Hebdo office beitu an ni tih an sawi
Yemen-a inkhuar, Al-Qaida in the Arabian Peninsula (AQAP) chuan kar kalta Nilainia France khawpui, Paris-a Charlie Hebdo magazine office bei a, thawktu mi 12 kaphlumtute chu an mi leh sate an ni tih an sawi.
AQAP hian Nilaini khan video tichhuakin, pawikhawihna thleng hi an pawlin an ruahman leh a senso pawh an tum vek a ni, an ti. Mahse Zirtawpnia Paris-a Jewish Kosher grocery store beihnaah erawh chuan an inhnamhnawih thu an sawilang lo. Video an tihchhuah hi minute 11 a thui a ni a, AQAP commander Nasr al-ansi chuan Charlie Hebdo beih a nih chhan chu zawlnei Mohammad tana phuba lakna a nih thu sawiin, France chu Setana pawl a ni a, chhiatna dang pawh a la tawk dawn a ni tiin a vau zui.
US official-te chuan AQAP video tihchhuah midang siamchawp a ni lo tih an sawi a, hemi rual hian pawikhawihna thlenga mawhphurtu nia an insawina hi a dik ngei em tih erawh hriatchian a nih loh thu an sawi. AQAP hi al-Qaida branch zinga thawm a na ber an ni.
Firfiakte'n an beih hnua a vawi khatna turin Charlie Hebdo magazine chu Nilaini khan tihchhuah chhunzawm a ni a, ṭum danga copy 60,000 vel an tihchhuah laiin, edition thar ber hi copy maktaduai thum siam a ni a, mahse mipuite'n an inchan loh nasat avangin chhut belh a ni nghal bawk a, copy maktaduai nga vel an hralh chhuah an beisei.
Charlie Hebdo magazine issue thar ber hi 'survivors issue' tiin an vuah a, ṭawng chi ruka tihchhuah a ni. He magazine hralhna aṭanga sum an hmuhte hi misual kut tuara thi, thawktu mi 12 chhungte hnenah pek a ni ang.
Magazine-ah hian Muslim zawlnei Prophet Mohammad-a cartoon tihchhuah a nih avangin firfiakte'n an office hi an bei a, mahse beih an tawh hnua issue tihchhuah thar ber kawmah hian zawlnei Mohammad-a lem bawk an hmang leh a ni. Hei hi Islam firfiak pawl hrang hrangte chuan an sawisel a, Islamic State (IS) chuan magazine buatsaihtute hian thil atthlak tak an ti a ni, a ti.
Charlie Hebdo office beih a nih hnuah hian France rama website 1,000 chuang hack sak an ni tawh bawk.