Pakistan-in Jamaat-ud-Dawa leh Haqqani network a khap dawn

Pakistan sorkar chuan Jamaat-ud-Dawa (JuD) leh Afghanistan-a hmunpui nei, Haqqani network-te chu dan pawnah a hnawl dawn.

Pakistan Prime Minister Nawaz Sharif-a kaihhruai sorkar hi an ram chhunga firfiak pawl awmte nuaibo turin nawr reng a ni a, hei vang hian sorkar chuan pawl pa­hnih­te dan pawna hnawlna a tihchhuah bakah, firfiak pawl dang pawh hnawhchhuah chhunzawm an la tum a ni.

Kum 2008-a Pakis­tan firfiakte'n Mumbai khawpui an beih ṭuma a ruahmantu bera puh, Hafiz Muhammad Saeed-a kaihhruai JuD chu dan pawna hnawl turin India leh US chuan ṭum eng maw zat an lo nawr tawh bawk. Thawhlehni khan US chuan Tehreek-e-Taliban Pakistan (TTP) hotu, Mullah Fazlullah chu global terrorist-ah puangin, hrekna tur a siam nghal bawk.

US leh Afghanistan official-te chuan Pakis­tan spy agency, ISI chu Afghanistan-a inkhuar, Haqqani firfiak pawl puih ṭhinah a puh a, mahse hei hi Pakistan sorkar chuan a pha thung. Haqqani hi kum 2012 September thla khan US chuan terrorist organisation-ah a lo puang tawh a ni.