Ebola hri vei thar an tlahniam

Africa khawthlang lama Ebola hri leng mek chuan ziaawm lam a pan ṭan tawh a, kar kalta chhunga hri kai thar awm zat chu hun rei tak hnua a tlem ber ṭum a ni tih World Health Organisation chuan a sawi.

Ebola hri kai hi mi 21,296 awm tawhin, an zinga mi 8,429 in an thihpui a, Liberia, Sierra Leone leh Guinea-te chu hri leng hluarna ram an ni.

Sierra Leone leh Guinea ramte chuan nikum August thlaa Ebola hri a len aṭangin kar kalta kha kai thar an tlem ber ṭum

a ni, an ti a, Liberia-ah chuan kar kalta khan hri kai thar an awm lo bawk.

UN Secretary General Ban Ki-moon chuan kumin kum laihawl velah chuan hri leng hi khuahkhirh theih a ni tawh ang, tiin a lo sawi tawh a, WHO chuan hri leng hian ziaawm lam pan mah se, khuahkhirh a nih theih hun tur erawh chu sawilawk theih a ni lo tih a sawi thung.

WHO thupuangtu Winne Romeril chuan, "Ebola leng mek hi WHO chuan a reh thuai a beisei a, mahse a reh hun tur erawh a sawilawk thei lo a ni," a ti a, hri leng tireh tur chuan a veite uluk leh fimkhur taka enkawl te, hrileng vanga thite ṭha taka phum te a ngai a ni, a ti.