Eirukna do turin Pope-in Philippines ram hruaitute a ngen

Roman Catholic kohhran hotu, Pope Francis chu ni nga cham turin Philippines ah Ninga­ni khan a zin a, nimin khan presi­dential palace-ah thu a sawi.

Pope chuan Philippines ram hruaitute chu mi tinte intluk tlang leh rorelna dik an neih theihna tura thawk tur te, mi retheite aw ngaihthlak sak turtein a ngen a, Philippines rama mi retheite ṭanpui turin ram hruaitu leh mipuite chu eirukna do let turin a ngen bawk.

"Ram hruaitute chuan rin­awm­na leh zahawmna vawng nungin, ram tana thil ṭha ti tura an inpek tak tak a ngai a ni," a ti. Francis hian Philippines President Benigno Aquino a kawm bawk.

President Aquino hian eiruknaa inhnamhnawiha puh, Supreme Court chief justice paihthlak a nih theihna turin hma a lo la tawh a, a thiltih avang hian khawvel huap pawhin fak a hlawh phah hle. Eirukna doin a campaign nasa hle a, a hmalakna avang hian senator pathum pawh tantir an ni tawh bawk.

Hetihlai hian eptu lam chuan eirukna doa a hmalaknaah, President Aquino hian a thawhpuite chhui tel loin, eptu lam chauh a thlurbing niin an puh.

Philippines ram mipui hmun li-a ṭhena hmun khat vel chu ni khatah cent 60 leh a aia tlem hmanga khawsa niin official poverty survey chuan a tarlang. Retheihna avang hian khawsak nawmna zawngin Filipinos maktaduai 10 vel chu rampawnah an kalchhuak a ni.

Pope chuan Philippines ram a kal chhan ber pakhat chu kum 2013-a Yolanda-a thlipui, Super Typhoon Haiyan tlehna hmun tlawh a nih thu a sawi a, he thlipui tleh vanga thi leh chin hriat loha awm chu mi 7,350 chuang an tling a ni. Vawiin hian thlipui tlehna bial, central Philippines-ah Pope hi a kal ang.

Spanish colony hlui, Philippines hi Asia ramah Catholic tamna ram a ni a, a ram mipui maktaduai 100 vel zinga 80% hi Catholic an ni. Pathianni hian Pope chuan Manila park-ah open-air mass a buatsaih dawn a, mi maktaduai ruk vel an tel rin a ni. Kum 1995 khan Pope John Paul II chuan Manila park-ah hian mass a lo buatsaih tawh a, mi maktaduai nga an tel.