Myanmar hmar lamah inbeihna thleng leh

Myanmar hmarlam, Kachin state-ah sorkar sipai leh Kachin helho an inbei leh a, mi tam tak hmun him lamah an tlanchhia.

Ningani khan Hpakant bialah inbeihna hi a thleng leh. Kachin helpawl, Kachin Independence Army (KIA) chuan state transport minister chu hun rei vak lo an hreng a, hei vang hian Myanmar sipaite chuan hel lakah hian beihpui an thlak thar leh a ni.

Inbeihna thleng vang hian tualchhung mi tam tak an tlanchhiat bakah, zirlai 200 vel chu biak-in hrang hrangah an biru bawk. Kachin Peace Network activist, Khon Ja chuan, "Hpakant bial chhunga thingtlang khaw hrang hrang aṭangin mi 800 vel chu an in chhuahsanin an tlanchhia a, monastery leh biak-inahte an awmkhawm a ni," a ti. Inbeihna bialah hian sipai 1,000 vel dah an ni bawk.

Helhoin an hren, minister Kamann Du Naw hi reilote hnuah chhuah leh ni mah se, helpawlte hian police officer pathum chu an la hreng chhunzawm rih a ni.

KIA commander Colonel Tan Seng chuan sipaite chu silai hmetpuak hmasaah puhin, "Kum khat chuang zet chu hetianga inbeihna nasa hi kan la tawk lo," a ti.