IS firfiakte'n Yazidi mi an hren zinga 200 an chhuah

Islamic State (IS) firfiak pawl chuan Iraq hmarlama Yazidi mi an hren zinga mi 200 chuang chu kar kalta Inrinni khan an chhuah. An chhuah zalente hi kum upa lam leh damlote an ni a, nausente pawh an tel.

Yazidi mite hi thla eng emaw zat firfiakte hian an hreng tawh a, Inrinni khan Kirkuk khaw chhimthlang lamah an chhuah a, Kurdish sipaite'n lo lain Altun Kopri-a health centre-ah an hriselna dinhmunte an endik sak nghal.

Yadizi rights activist Khodr Domli chuan, IS-te hian heng mite hi Mosul khuaah an hreng tih a sawi a, an zinga mi ṭhenkhat chuan hliam an tuar a, rilru lama harsatna neite pawh an awm tih a sawi.

IS hian an mi hrente an chhuah chhan hi an sawi lo.

Nikum August thla khan IS hian Yazidi hnamte hi beiin, mi tam tak an thah bakah mi sang tel chu Iraq hmar thlanglam, Sinar tlang dungah an hreng zui a ni.

Chhuah zalen zinga pakhat chuan firfiakte hian chhuah an nih tur thu an hrilhlawk lo a, bus-a an hruai­chhuah chuan an tihlum dawn nia an ngaih thu a sawi. Mahse Kurdish khawpui, Kirkuk lamah an hruai ta zawk a ni. An zinga pakhat, wheelchair-a awm chuan thla eng emaw zat chu pawn­chhuak thei loa hrenbeh an nih thu a sawi a, ei tur pawh an pe ṭha lo tih a sawi bawk.

Yazidi hruaitute chuan firfiakte hian Yazidi mi 3,000 vel an la hreng niin an sawi a, heng mite hi hmeichhia leh naupangte an ni tih an sawi. An hmeichhe hren zinga tam tak hi IS hian pasal an neih luih tir a, ṭhenkhat chu an hralh bawk.