UN hotuin Mali-a UN camp beih a dem

United Nations Secretary General, Ban Ki-moon chuan Mali hmar lama UN Multidimensional Integrated Stabilization Mission camp beih a ni chu a dem thu a sawi.

Kar kalta Inrinni khan firfiakte chuan Mali hmarlam, Kidal-a UN Multidimensional Integrated Stabilization Mission in Mali (MINUSMA) camp an bei a, Chadian peacekeeper pakhat an kaphlum.

UN hotu chuan firfiakte thiltih hian UN-in Mali mipuite ṭanpuina tura a hmalaknaah a tihzam phah dawn lo a, he pawi­khawihna thleng hian Mali rama politics buaina chinfel thuai a ngaihzia a tilang zawk a ni, a ti.

Kum 2012-a sipai chakna hmanga sorkar paihthlak a nih hnu khan Mali tualchhung dinhmun hian ngai a la awh thei lo a, an ram hmarlam chu helho thununna hnuaiah a awm mek a ni.

Mali rama hian UN leh African Union puihnain democracy tundin leh tuma beih mek a ni a, security lamah pawh hma sawn mah se hmarlam boruak erawh a la ṭha lo hle.