Brazil leh Netherlands-in Indonesia-a an palai ko haw

Brazil leh Netherlands chuan Indonesia sorkarin ruihhlo kaihhnawiha an man mi parukte an tihhlum avangin Indonesia rama an ambassador-te an ko haw.

Nimin zing khan Indonesia sorkar chuan ruihhlo tawlhruk kaihhnawiha a man mi parukte chu a kaphlum a, heng mite hi ramdangmi panga leh Indonesia mi pakhat an ni. Ramdang mite hi Nigeria, Malawi, Vietnam, Netherlands leh Brazil mi an ni.

Brazil leh Netherlands hian Indonesia sorkar hnenah hian an mi mante chunga zahngaihna lantir turin an lo ngen tawh a, mahse an ngenna hi a ngaihpawimawh sak loh avangin an palai dahte hi an ko haw ta tih an sawi.

Thuchhuah a siamah Brazil President chuan, "Thi tura hremna pek hi khawvel ram hrang hrangte pawhin an dem a, hei hian ram leh ram inlaichinna thlengin a nghawng thei a ni," a ti. Ne­therlands Foreign Minister Bert Koenders pawhin mihring dikna leh zahawmna ngaihpawimawh lohna, thil pawm theih loh a ni, a ti bawk.