Niger-ah Charlie Hebdo cartoon duhlote'n biak-in an hal

Charlie Hebdo chan­chinbu-in Muslim zawlnei Muhammad-a cartoon a tihchhuah chu Niger ramah duh lohna lantir thar leh a ni. Lung­awi lohna lantirtute hian biak-in paruk an bei a, mi pathum an thi.

Nawrh huaihawt hi Niamey grand mosque aṭangin an ṭan a, ramchhung hmun dangah a kangkai ta a ni.

Niger President Mahamadou Issoufou chuan Prophet Muhammad cartoon tihchhuah avanga lungawi lote'n tharum thawhna an thlen chu a dem thu sawiin, buaina titawp turin a ngen.

Niamey leh chhehvel khuaah hian biak-in paruk chu hal leh rawk a ni a, muslim ni lote ta - bar, hotel leh sumdawnna hmunte pawh an bei bawk. Niamey khawdaia biak-in halah ruang pahnih hmuh a ni a, bar an beihnaah hmeichhe pakhat ruang hmuh a ni.

President Issoufou chuan, "Sakhaw hmun pawi­mawh beia ti­bawrh­bangtu leh, Kristiante thattute chuan Islam sakhaw hi an hrethiam tak tak lo," a ti. Pakistan, Sudan leh Algeria khawpuiahte pawh kar kalta Zirtawpni khan Charlie Hebdo cartoon duh lohna an lantir bawk.