Pope-in Manila-a mass a buatsaihah tel an thahnem

Roman Catholic kohhran hotu, Pope Francis chuan nimin khan Philippines khawpui, Manila-ah mass a buatsaih a, mi maktaduai ruk vel tel tura beisei an ni.

Pope-in mass a buatsaihna, Rizal Park-ah chuan zingkar, hma tak aṭangin mi tam tak an pungkhawm tawh a ni.

Vatican chuan Pope Francis hian a service chu kum 2013-a Philippines rama thlipui, Typhoon Haiyan tleh vanga chhiatna rapthlak tak thleng tuarte tan a hlan tih a sawi. Typhoon Haiyan tleh hi province 44 in an tuar a, mi maktaduai 14.5 vel a nghawng a ni. Tun thlengin thlipui tlehin chhiatna a thlen vang hian mi maktaduai khat vel chu chenna in nei loin an la awm.

Nimina Mass a buatsaih hi Pope-in Philippines-a a hun hman hnuhnung ber tur a ni a, Pope hian ni ruk chamin Sri Lanka leh Philippines ram a tlawh a ni.

Mass a buatsaih hmain Pope hian nimin zing khan Asia rama Catholic university lian ber, University of Santo Tomas-ah sakhaw hruaitute leh ṭhalaite a kawm. Pope Francis hian zirlai 20,000 chuangte meeting a neihpui bawk.

Pope chuan society-ah hmei­chhia leh hmeichhe naupangte thu ngaihchan leh ngaithlak sak hun a awm a ni a ti a, "Hmeichhiate chuan thil tam tak min hrilh tur an nei a ni," a ti. Hmeichhiate chuan mipate an thlir dan ang ni loin thil an thlir thiam a, mipate'n an hriatthiam phak loh zawhnate an siam thei a ni, a ti.