Ukraine tan NATO in F-16 jet a thawn chhuak ṭan

North Atlantic Treaty Organisation (NATO) chuan Ukraine hnenah indo thlawhtheihna, F-16 an thawn chhuak ṭan tih Nilaini khan a puang. NATO hi aṭum 75-na atan Washington, US-ah intawk khawmin NATO-ah Ukraine tel tura lakluh chungchangte pawh sawi ho a ni.

US president Joe Biden chuan Denmark leh Netherlands in US siam, F-16 indo thlawhtheihna Ukraine hnenah an thawn chhuah tawh thu a sawi. NATO ram palaite chu Russia ralthuam siam chhuah ang zat siam chhuak tura ṭan la turin a fuih a, Russia president Vladimir Putin-a'n kum 2022-a Ukraine a rûn hnuah an ralthuam siam chhuah pawh an tipung niin a sawi. Biden chuan NATO-a tel ramte ramri chu an zavaia ṭangrualin an humhim zel dawn tih a sawi bawk. Hemi hma hian Biden chuan Germany-ah US long range missile dah a remtih tawh a, Ukraine chu air defence system pek belh a lo tiam tawh bawk.

Ukraine president Volodymyr Zelenskyy chuan NATO ramten F-16 an pek vangin lawmthu a sawi a, an indo thlawhtheihna thar chu remna tluantling an neih theih nan a ṭangkai ngei beiseiin firfiaka che ṭhinte chu an tlawm a ngai tih a sawi bawk. NATO hian ralthuam lei nan USD tld 43 nakkum ral hmaa pek turin an summit neihah hian a lo pawm tawh bawk a ni. NATO summit-ah hian Ukraine lak luh chungchang pawh sawi ho niin thuchhuah an siam danin Ukraine chu lak luh ngei an tum a ni.