Covid-19 vangin kartin mi 1,700 an la thi : WHO

World Health Organisation (WHO) chuan Covid-19 hri chu a hma angin hluar tawh lo mah se, khawvel pum huapin he hri avang hian kartin mi 1,700 bawr an la thi ziah tih a sawi. Mipuite chu Covid hri laka invenna tura vaccine la ṭha turin a chah leh bawk.

WHO director-general Tedros Adhanom Ghebreyesus chuan Covid vaccine pek chhuah lam ngaihthah a ni chho chu pawi a tih thu sawiin, 'Data aṭangin health worker-ten vaccine a pek chhuahna chin chu a tlahniam a, hei bakah he hri laka inven ngai zual, kum 60 chung lamah pawh vaccine la an tlahniam a ni," a ti. WHO chuan Covid-19 vaccine hi high-risk group chuan a lak hnuhnun ber aṭanga thla 12 chhungin a dose dawt chu la leh ngei turin a chah.

Khawvel pumah Covid hripui vanga thi, WHO-a report chin hi maktaduai sarih chuang an tling a, mahse a zat tak hi report ai hian a tam rin a ni thung. Kum 2019 kumtawp lama Wuhan, China aṭanga leng ṭan, Covid-19 vang hian WHO chuan khawvel pumah public health emergency puangin, kum thum chuang hnu, May 2023 khan health emergency puan hi tihtawp a ni. Hemi rual hian ram hrang hrangte chu he hri chungchanga la fimkhur reng tur leh, test leh vaccine pek chhuahte pawh chhunzawm zel turin a chah a ni.