Nepal : Leiminin bus pahnih a hnawl

Nepal-ah nimin khan leiminin bus pahnih a hnawl a, a chhunga chuang mi 66 chu a thlang luiah hnawl thlain chin hriat lohin an awm.

Chhanchhuaktu pawl chuan leiminin a hnawl bus leh a chhunga chuangte la zawng mek a ni. Ruah sur a la tam avangin chhanchhuah hnathawh hi thawh chak theih a ni lo a, sorkar official, Khima Nanada Bhusal chuan bus hnawl a nihna hmun panna kawng pawh hmun tam takah leimin vangin a ping niin a sawi.

Nepal thuneitute chuan bus hi nimin zing dar 3 vela chesual niin an tarlanga, chhanchhuah hna thawktute leh security force-te chu chetsualna hmunah hian tirh luh nghal an ni. Hriattheih chinah bus pakhatah hian mi 24 chuangin a dangah mi 42 an chuang a, hetih rual hian kawng lakah mi lak belh an neih chuan mihring chuang zat hi tarlan ai hian an tam dawn a ni. Nepal hi tlangram a nih vangin fur laiin leimin a tam ṭhin a ni.