China leh Bangladesh-in inremna 21 an ziak

Ni thum chama China rama zin, Bangladesh prime minister Sheikh Hasina leh China president Xi Jinping-te chuan meeting neiin, ram pahnihte thawhdunna tur inremna 21 an ziak. An inlaichinna tihnghehna turin project thar pasarih siam belh a nih thu an puang bawk.

Ram pahnihten inremna an siam hmang hian, China chuan economy lama Bangladesh puihna turin grant, a pung awm lo loan, loan pung tlem leh commercial loan te a pe dawn tih China President chuan a sawi. President Xi hian Bangladesh in hma a sawn theihna tura sum lama puih dan chungchang hi ram pahniha technical committee-te chuan an ngaihtuah ho a remti bawk a, China technical committee chu Bangladesh-ah a kal thuai dawn tih a sawi.

Beijing-a Great Hall of the People-a meeting-ah hian ram pahnih aiawhte chuan thawhdunna ṭha leh nghet zawk neih an duh thute pawh an sawi a, China chuan nakkuma ram pahnihten palai an intirh tawnna kum 50 pualin Belt and Raod project leh a dangah thawhdunna thuk zawk neih a duh thu a sawi a ni.

President Xi chuan Rohingya Muslim te harsatna tawh chungchang pawh sawi chhuakin, an buaina chinfel a nih theihna atan Myanmar sorkar leh Arakan Army pawh inbiakna neihpui a tiam.

Ram pahnihte hian culture, tourism, media, sports leh field danga thawhdunna leh exchange programme siam turin kum tharah 'China-Bangladesh Year of People-to-People Exchange' neih an remti bawk a ni.