Boko Haram-te'n Cameroon-ah mi 80 an ru bo
Nigeria helpawl, Boko Haram chuan Pathianni khan Nigeria ramri kanin, Cameroon hmarlama ramri bul khua an bei a, mi 80 an ru bo. An rukbo zingah hian naupang eng emaw zat an tel.
Boko Haram hian Nigeria hmarlamah Islamic State din tumin kum 2009 aṭang khan an hel tawh a, mi sang tel an thah bakah mi tam tak an rubo tawh a ni. Boko Haram pawikhawihna vang hian mi maktaduai 1.5 vel chu hmun him lam panin an tlanchhe bawk. Nigeria bakah an ram ṭhenawm, Cameroon leh Niger-ahte pawikhawihna an thlen fo a ni. Tun hnaiah an ṭhenawm ram, Camerron, Chad leh Niger-ahte an pawl member tur lakluh runpui pawh an lo nei tawh a ni.
Pathiannia mi an rukbo hi Cameroon leilunga ṭum khata mi an rukbo tam ber ṭum a ni a, hetihlai hian ramria Cameroon sipai duty te pui turin Chad chuan sipai eng emaw zat a tir a ni.
Boko Haram-te hian Pathianni zing khan ramria Mabass leh thingtlang khaw dangte an bei a, Nigeria sipaite nen darkar hnih vel an inkap. Cameroon sorkar thupuangtu, Issa Tchiroma chuan helpawlin mi an rukbo tih a finfiah tawh a, khua an beihnaah hian mi pathum an kaphlum bawk niin a sawi.
Kumin kumtir lam khan Boko Haram hotu Abubakar Shekau chuan online-a video a tihchhuahah, Cameroon chuan a ram danpui siamṭha a, Islam sakhua a pawm loh chuan an rama pawikhawihna an thlen tur thu a lo sawi tawh a ni.
Pathianni vek khan Nigeria hmarchhak lama Potiskum khuaah thihchilh bomb a puak a, mi panga an thih bakah mi 35 in hliam an tuar.