Ukraine-in Putin-a rawtna a hnawl

Ukraine President Petro Poroshenko chuan Russia President Vladimir Putin-a'n remna a awm theihna tura ruahmanna a siamte a hnawlsak.

Putin hian kar kalta Ningani khan Poroshenko hnenah hian rawtna a siamte a thawn a, a rawtna siam zingah hian Ukraine chhimchhak lama hel leh Ukraine sipaite inkara inkahhai puan te, ralthuam an dah lakkir te a tel.

Ukraine President chuan an ram khaw­chhak, inlakhran tumte awmna bial chu sorkar thununna hnuaiah dah leh tumin theihtawp chhuah chhunzawm a nih tur thu a sawi a, helho hnenah an ram chu inch khat pawh an pe dawn lo a ni, a ti.

Ukraine Foreign Ministry chuan Minsk agreement an siam tawh a taka kalpui hun tur bithliah a inremna ziak turin Russia a phut bawk a, he inremna an ziahah hian ramria thuneihna chu Ukraine sorkar kuta dah te, ramdang sipai dahte lakchhuah leh ral­thuam rip tak tak dahte lakir vek tura tih a ni.

Kar kalta kartawp lam aṭang khan Ukraine khawchhak lam, Donestk bialah sorkar laka hel leh sorkar sipaite chu nasa takin an inbei chhunzawm leh. Thuneitute chuan helhoin Vuhlerisk-a chenna in an kah avangin naupang pahnih an thi tih an sawi.

Helho hian kar hmasa khan Donetsk airport chu an thununna hnuaiah an dah a, mahse Ukraine sipaite chuan bei letin, airport leh a chhehvel bial chu helho kut aṭangin an la kir leh tawh tih an sawi.