Israel sipaite'n Hezbollah hel 5 an kaphlum
Pathianni khan Israel sipaite chuan thlawhtheihna hmangin Golan Heights-a Syrian sector-ah beihpui an thlak a, Hezbollah hel panga an kaphlum. Thi zingah hian Hezbollah commander hlui Imag Mughniyeh-a fapa pawh a tel nia sawi a ni.
Hezbollah chuan Israel sipaite hian Quneitra province-ah beihpui an thlak tih an sawi a, mahse hemi chungchang hi Israel lam chuan engmah a la sawi lo.
He thil thlen hma hian Hezbollah hruaitu, Hassan Nasrallah chuan Israel hi a lo vau tawh a, Israel-in Syria ram chhunga beihpui a thlak ṭhin chu an la chhanglet dawn tih sawiin, an mi leh sate chuan Israel an beihna tur hian ralthuam pawh an chhehkhawl mek a, heng zingah hian long-range missile pawh a tel tih a sawi. He missile hmang hian Israel ram khawi hmun pawh an kap pha dawn tih a sawi.
Syria ramah hian President Bashar al-Assad paihthlak tumtu, eptu pawl leh sorkar sipaite inbeihna avangin mi 200,000 chuang an thi tawh a, Hezbollah helho hian President Assad-a lam hi an thlawp a ni. Tualchhung buaina a thlen hnu hian Israel chuan ṭum eng emaw zat thlawhtheihna hmangin beihpui a thlak tawh a, hei hi Syria leh Iran sorkarin rocket an lo chhekkhawlte Hezbollah pawl hnena an pek tur venna atana ti an nih thu an sawi.