Sri Lanka Police-in President hlui in an dap

Sri Lanka Police-te chuan an ram President hlui, Mahin­da Rajapaksa chenna in chu nimin khan an dap.

Rajapaksa fapa, Namal Rajapaksa chuan police-te hian Tangalle-a an in dapin, luxury sports car, Lamborghini car an zawng a, mahse an hmu zo lo tih a sawi. "Kan in chauh ni lo, kan ṭhiante in thlengin an dap a ni. Kan thiante in pawh an dap ve zel avangin tlawh pawh kan tlawh ngam tawh lo a ni," a ti.

Police thupuangtu, Ajith Rohana chuan court thupek angin President hlui in hi an dap tih a sawi. Police-te hnenah hian thu dik lo hmangin complain thehluh a ni a, President hlui hian a inah sea plane leh racing car tyre-te a thukro nia sawi a ni tih Namal chuan a sawi. Mahse an dap hnuah police-te hian pre-school naupangte'n an hman ṭhin, pedal boat chauh an hmu a ni.

Rajapaksa in dapsak a nih hma hian police-te chuan a nau, Gotabhaya-a'n tualthattu pawl, 'death squad' a siam nia puhna leh, newspaper editor lar tak pakhat that tura thupek a siam nia puhna an chhuichiang tawh bawk. A unau dang, Basil Rajapaksa pawh thil dik lo tihna eng emaw zatah inhnamhnawiha puh a ni bawk.

January 8-a Sri Lanka President thlanna neihah Rajapaksa hian President term thumna chelh leh tumin chuh mah se, eptu pawl candidate, Maithripala Sirisena a hneh zo lo.

President thlanna neih dawna an campaign-naah, eptu lam chuan Rajapaksa fapate chu helicopter bakah UK aṭanga sakawr man to tak tak leiah te, racing car manto chi neiahte an puh a, inthlan zawh hnuah pawh Sri Lanka media-te chuan President a nih laia an chhungkaw khawsak dan hautak tak an pholang fo a ni.

Mahinda Rajapaksa hian kum 2005 aṭang khan Sri Lanka President hna a chelh a, thuneihna a chan chhung hian Sri Lanka sorkar leh LTTE helte indona tihtawp a ni.