Israel-in ramri-ah venhimna a tikhauh

Israel chuan Pathiannia Golan Heights-a Syria ramchhunga beihpui a thlaknaah Hezbollah member eng emaw zat an kaphlum a, hei vang hian Hezbollah helte hian an beihlet mai venthawn thilah a ram hmarlama ramri-ah venhimna a ti khauh.

Israel Defence Forces (IDF) chuan Israel hmar lama hmun tam takah Iron Dome anti-missile battery a dah niin Arabic Sky News chuan a tarlang a, mahse IDF lam chuan an sawichiang duh lo.

Golan Heights an bei nia puhna chungchang hi Israel lam chuan a sawifiah duh lo a, mahse IDF Chief of Staff Benny Gantz chuan Israel sipaite chuan Golan Heights hi ngun takin an thlithlai reng tih a sawi. "A ṭul huna che chhuak turin IDF chu a inring reng a ni," a ti.

Nimin khan Israel rama Arab mi maktaduai 1.7 chuan tun hnaia Israel police-te kut tuara Bedouin mi pahnih thihna thleng an duh lohna lantirin ram pumah nawrh an huaihawt. Arab Israeli group chuan nawrh huaihawt vang hian an ram hmarlama Galilee leh chhim lama Negev thlengin zirna in leh sumdawnna hmunte khar a nih thu an sawi.

Kar hmasa khan police-te'n ruihhlo zuarte zawnga Bedouin khua, Rahat an dapnaah Sami al-Jaar chu silaia kah a ni a, police-te chuan silai hmetpuaktu hi police nge tualchhung mipuite tih an chhuichiang mek. Pathian­nia Jaar-a vuina inkhawmah buaina chhuakin police-te'n tear gas an kap a, kum 47 mi Sami-al-Zayadna chuan heart attack neiin a thihphah bawk.