SKorea-in leaflet tichhuak leh

South Korea activist-te chuan North Korea sawiselna thu ziak balloon hmang­in an thehdarh leh.

Activist-te hian a hma pawhin NKorea demna thu hi an lo thehdarh tawh a, hei hi NKorea thuneitute chuan sawiselin SKorea hruaitute hnenah activist-te thiltih chu khap turin a lo phut tawh a, an ti nawn leh a nih chuan sipai chakna hmanga bei letah hial a vau.

SKorea sorkar chuan activist-te hnenah hian Korea ram pahnihte inkar boruak tichhe tur zawnga thutlukna siam lo turin a lo ngen tawh bawk a, an thiltih chuan a bikin ramri chhehvela chengte dinhmun a tih him loh phah tih an sawi bawk.

Sorkarin ti tawh lo turin ngen mah se, Park Sangh-hak-a kaihhruaiin activist-te hian NKorea ramri bulah balloon eng emaw zat an chhuah leh a ni.

Park chuan tun hnaia NKorea ram hotu lu ber, Kim Jong-un thah tuma phiar­rukna film, The Interview chu North Korea lama balloon an chhuahah hian an dah tel tih a sawi. He film siam hi NKorea chuan a sawisel nasa hle a, US sorkar pawhin a dem thu a lo sawi tawh bawk.