ISIL-te'n Japan mi 2 Thahah an vau
Islamic State of Iraq and the Levant (ISIL) firfiak pawl chuan video thar an tichhuak leh a, hetah hian hian Japan mi pahnih an hren mekte tlanchhuahna atan dollar maktaduai 200 pe turin Middle East tlawha zin, Japan Prime Minister Shinzo Abe an phut thu an sawi.
Video hi ISIL hnuaia 'Al-Furqan media arm' siam a ni a, Thawhlehni khan an pawl website-ah an phochhuak. Firfiakte chuan an sum phut hi darkar 72 chhunga Japan PM-in a pek loh chuan an mi hrente pahnih thahah an vau.
Japan official-te chuan ISIL video hi an enfiah tur thu an sawi a, hetihlai hian Jerusalem-a chanchin thar lakhawmtute a kawmnaah, Abe chuan firfiakte chu an mi hrente chhuah turin a ngen.
Abe leh Japan official dangte chuan IS te'n an hren mek, Kenji Goto leh Haruna Yukawa tlanchhuahna sum an phut chu pek a nih dawn leh dawn loh an sawilang lo.
Goto hi freelance journalist a ni a, nikum khan Syria tualchhung indona thleng chungchanga report a pek laiin man a ni.
Yukawa erawh private military contractor a ni a, nikum August thla khan Syria ramah bawk man a ni.
US kaihhruai, Iraq beihnaa Japan a tel ve avanga phuba lakna atan kum 2004 khan Iraq ramah Japan mi pakhat chu al-Qaida-te'n a lu an lo tansak tawh bawk.
ISIL video tihchuahah hian Japan mi pahnih an mante hi jumpsuit, serthlum rawng hain an lang a, an inkarah mi pakhat hmaituam a ding bawk. Video hi a hmaa mi panga an hren, an tih-hlumte video an tihchhuah nen a in ang hle.
Mi hren pahnihte inkara ding hian chem a keng a, Japan Prime Minister hnena thuchah sawiin, "Islamic State awmna aṭangin km 8,500 chuanga hlaah awm mah la, kan laka beihpui thlaknaa tel i duh a ni' a ti a, "Muslim mite in tihchhiat a, kan hmeichhia leh naupangte tihhlum an nih theihna turin dollar maktaduai 100 i thawh a, hei bakah hian IS-in a ram a zauh zel tur danna atan dollar maktaduai 100 i thawh bawk," a ti. Hei hi Abe-a'n Egypt-a a cham laia Iraq sorkar puihna atan leh, Syria raltlante chhawmdawlna tursum pek a tiamte an sawina a ni.