Tunisia court-in sipai sawichhetu blogger hrem

Tunisia court chuan blogger Yassine Ayari chu sipai tihmingchhe zawnga thu a ziah avangin kum khat tang turin a hrem.

Kum 33 mi, Ayari hi nikum December khan Paris aṭanga an rama a haw hnuah man a ni a, Thawhlehni khan a hremna tur puan a ni.

Ayari hian a blog-ah an ram sipai officer leh Defence Ministry office-te chu sum tichingpenah a puh a, hei bakah hian nikum October thla an ram inthlanpui neiha hnehna changtu, Nidaa Tounes party sawiselna pawh a ziak bawk.

Court-in hremna a tihchhuah hnu hian Ayari ṭantu mi ṭhenkhat chu court bulah an pungkhawm a, Ayari chu chhuah nghal tura an phut thu leh, hremna pek a nih dan chu freedom of expression palzutna a ni, an ti. Ayari ukil-te chuan court thutlukna hi appeal an tum thu an sawi.