Palestinian-in Tel Aviv bus a bei

Nimin khan Palestinian mi pakhat, dan loa Israel rama lut chuan Tel Aviv-a bus pakhat chu chem nen a bei a, bus-a chuang Israel mi 12 in hliam an tuar. Hliam tuar zinga pathumte hi an dinhmun a ṭha lo hle.

Pawikhawihtu hi kum 23 mi, West Bank, Tulkarem-a cheng a ni a, pawi a khawih hnu hian Israel Prison Service officer chuan a ke-ah kap hliamin, an man nghal.

Israel Police foreign press thupuangtu, Micky Rosenfeld chuan he thil thleng hi firfiakte beihnaa an ngaih thu a sawi.

Israel Foreign Minister Avigdor Lieberman chuan pawikhawihna thleng chungchangah hian Palestinian leh Arab hruaitute a dem thu a sawi a, Israel nuaibo tuma beihna pakhat a ni, a ti. Habayit Hayehudi hruaitu, Economy Minister Naftali Bennet pawhin Palestinian President Mahmoud Abbas a dem thu a sawi bawk.

Kar hnih liamta khan Jerusalem-ah Juda mi pakhat chu a hnunglam aṭangin screwdriver-a vih a ni a, a vittu Arab mi chu a tlanbo nghal. Nikum December thla khan Shin Bet security service chuan Palestinian hmeichhe pakhat, Tel Aviv-a thihchilh bomb tihpuah tumtu chu an man thu an lo sawi tawh bawk.