US leh Iran official-te'n nuclear talk nei dawn

US State Department chuan Iran nuclear program chungchangah US leh Iran official te'n inbiakna an nei leh dawn tih a sawi.

Ram pahnih official-te hian vawiin leh naktuk hian inbiakna an nei leh dawn a, inremna siam dan kawng an zawng ang. He inbiakna hi Iran leh P5+1 ( Britian, China, France, Russia, US plus Germany) te'n Iran nuclear program chungchanga inbiakna an neih hrula neih tur a ni.

Kumin kumtir aṭang­in US leh Iran hian ṭum eng emaw zat inbiakna an lo nei tawh a, kar hmasa pawh khan Geneva-ah inbiakna an nei leh a, US Secretary of State John Kerry chuan ṭum hnih Iran minister a lo kawm tawh bawk.

US President Barack Obama chuan State of the Union speech a neihah, Iran hrekna dang siambelh rawtna bill-te chu a thuneihna hmanga dan zel a tum thu a sawi a, hetianga hrekna bill thar siam chuan Iran nuclear ralthuam siam tum, ven dan ngaihtuaha inbiakna neih mek boruak a tichhe thei a ni, a ti.

Deputy Secretary of State Antony Blinken pawhin hrekna thar siam chu thil ṭul lo tak a ni, a ti a, Iran ram hrekna an siam mek chu a program titawp tura nawrna atan a ṭha tawk a ni tih a sawi.

Hetihlai hian House of Representative Speaker, John Boehner chuan Israel Prime Minister Benjamin Netanyahu chu US Congress joint session, thla thara neih turah thu sawi tura a sawm thu a sawi. Israel hi Iran nuclear talk neih mek duhlotu lian ber zing a mi a ni. Congress thu­chhuah chuan, "Israel PM hi Congress-ah Islam firfiakte leh Iran-in kan ram himna leh mipui nunna an tihderthawn dante sawi turin ka ngen a ni," a ti.