Phuba lak tuma puhna Sri Lanka-in a hnawl

Sri Lanka President hlui, Mahinda Rajapaksa-a'n a laka phuba lak tuma sorkar a puhna chu Sri Lanka sorkarin a hnawl.

Media Minister Gayantha Karunathillake chuan President hluiin sor­kar a puhna chu thu awmze nei lo a ni, a ti a, sorkar chuan thleibik nei­loin eiruknaa lo inhnam­hnawihte thubuai a siamsak zel dawn a ni, a ti.

"President hlui chuan a duh ang angin a lo sawi thei a, mahse sorkar chuan eiruknaa inhnam­hnawih zawng zawngte chhui a, thubuai siamsak an nih theihna turin high-level committee a din a ni. Dik lo taka thiltih hi kan ngaizam mai dawn lo," a ti.

Minister chuan President hlui thlawptute'n tihduhdah an tawk nia an sawi chungchangah, complain an dawn chuan chhuichian a nih tur thu a sawi.

Rajapaksa hian President thar Maithripala Sirisena kaihhruai sorkar thar chu amah leh a thlawptute chunga phuba lak tumah a puh a ni.

President hlui chenna inah hian luxury sports car a awm nia sawi a nih avangin police-te chuan an dap tawh a, mahse engmah hmuh an nei lo.