London-ah IS beih let dan tur sawiho

Nimin khan London-ah khawvel ram 21-a senior official-te kalkhawm chuan Syria leh Iraq rama Islamic State (IS) firfiak pawl beihlet dan tur an sawiho.

Ni khat awh conference-ah hian US Secretary of State John Kerry bakah Iraq Prime Minister Haider Al-Abadi pawh a tel.

IS firfiakte'n mi thar lak runpui an neih ṭhin leh, an pawl ṭanpuina sum hnar tihtawp dante an sawiho a, khawmuala firfiak pawl beilettute ṭanpuina tam zawk pek dan te, indona avanga harsatna tawk mek civil mite chhawmdawlna pek dan turte pawh an sawiho bawk.

John Kerry chuan IS-te hneh duhna hi a hma zawng aiin a nasa tawh zawk tih a sawi a, "Firfiakte chuan mi ṭhen­darh an tum a, mahse an tum hi a hlawhtling lo. Min ṭhendarh loa, inpumkhatna ṭha min siamsak zawk a ni," a ti.

EU foreign policy hotu, Federica Mogherini pawhin inbeihna chu khawthlang ram leh Islam-te inbeihna a ni lo a ti a, "Arab ram hrang hranga khaw­tlang nun tichhia a, nunaute laka rawng taka chete duh loin kan thawkho a ni," a ti.

Iraq PM Abadi pawhin London a pan dawna chanchin thar lakhawmtute a kawmnaah, US kaihhruaia IS laka beihpui thlak mek chu ṭha a tih thu a sawi a, hemi rual hian boruak aṭanga beih ringawt a tawk lo a, khawmual sipaite pawh hmanraw ṭha zawk nena thuam an ngai tih a sawi.