US leh Cuba-te inbiakna a zo

US leh Cuba ramte chuan hun rei tak chhung an inkar boruak ṭha lo siamṭhaa, inzawmna ṭha zawk an neih theih dan kawng zawngin ni hnih awh inbiakna an nei a, inbiakna hi Ningani khan an zo.

Ram pahnihte hian an inkara inhriatthiam lohnate la awm mah se, an inkar boruak siamṭhat an duh ve ve tih an sawi a, mahse hemi tur hian tihtur hmabak tam tak an nei tih an sawi.

Meeting hi Cuba rama Havana Convention Palace-ah neih a ni a, Cuba aiawhte chu Foreign Relations Ministry (Minrex)-a US Affairs Department director general Josefina Vidal-i'n a ho a, US lam chu Assistant Secretary of State for Western Hemisphere Affairs Roberta Jacobson-i'n a ho thung. Jacobson hi kum sawmli chhunga Cuba ram tlawhtu zinga US highest-level official hmasa ber a ni.

Jacobson chuan inbiakna an zawh takah chuan inremna thuthlung siam hman lo mah se, a hlawhtling thawkhat nia a ngaih thu a sawi. "Hma lak chhunzawmna tur thil pawimawh tak tak kan sawiho a, embassy hawn chungchang te leh eng anga kalpui tur nge tihte kan sawiho a ni," a ti.

Cuba official-te pawhin inhawng taka inbiakna an nei thei chu lawmawm an tih thu an sawi a, an inkar boruakin ngai a awh chhoh leh theihna tur chuan US-in insumdawn tawnna kawnga Cuba a hrekna a hlih a ngai a ni, an ti.