Yemen President Hadi a bang

Yemen President Abdrabbuh Mansour Hadi chu Shia helpawl, Houthi-te'n an ram khawpui Sanaa an lak avangin President a nihna aṭangin a bang a, a rual hian Prime Minister pawh a bang nghal bawk.

President Hadi chuan Houthi pawlin remna leh muanna a awm theihna tura helpawl nena inremna an lo siam tawh an zawm duh loh vangin President hna hi a chelh chhunzawm thei tawh lo tih a sawi. Mahse Parliament chuan an banna hi a la pawmsak lo.

Yemen President leh PM-te'n banna an thehluh hnu hian, an rama intelligency agency hotu, Ali Hassan al-Ahmedi pawh a bang ve nghal nia sawi a ni bawk.

Hetihlai hian Houthi helte chuan President bang hi an lawm hle a, council din nghal an rawt a ni. Council din an rawtah hian Houthi hnuaia pawl hrang hrang telh an tum thu an sawi.

President leh PM-te an ban avangin Yemen ramchhung boruak hi a buai hle rin a ni a, President leh roreltu sorkar a awm loh chuan Yemen-a al-Qaida firfiak pawl branch-te an pawng hle rin a ni. Nimin zing khan Aden khuaah mi tu tih hriatlohte'n sipai motor pahnih an bei a, Matyrr's Square-ah bomb a puak bawk.