NLA-in Thailand PM hlui Yingluck-i thiam loh chantir

Thailand Prime Minister hlui Yingluck Shinawatra-i chu nimin khan sawisel hlawh tak, rice subsidy scheme a kalpui dan chungchangah National Legislative Assemby (NLA) chuan a chungthu ngaihtuahin, vote a la a, member 190 in thiam loh an chantir.

NLA-a vote laknaah hian member 190 in PM hlui dem zawngin vote an thlak a, a thlawp lamah vote 18 chiah a tla thung. Member 8 an hai bawk.

Member tam zawk chuan PM hlui hi a mawhphurhna hlamchhiahah an puh a, thiam loh an chantir avang hian kum nga chhung politics khelh khapsak a ni bawk.

Nimin zing khan Office of the Attorney-General (OAG) chuan rice scheme-ah vek hian PM hlui Yingluck-i lakah hian criminal case ziahluh a tum tih a sawi. OAG chuan thubuai siam tur hian finfiahna pawh an nei ṭha tawk, a ti a, thla khat chhungin Supreme Court-a Criminal Division for Holders of Political Positions-ah thubuai hi a thehluh an tum. He thubuaiah hian thiam loh chantir a nih chuan Yingluck hi kum 10 thleng lung-in tantir theih a ni.