IS firfiak-te'n Japan mi an hren zinga 1 an that

Islamic State (IS) firfiakte chuan Japan mi pahnih an hrente hun tiam chhunga an tlanchhuahna tur sum pe tura an phutna video an tihchhuah hnuah, an mi hren zinga pakhat an thah thu an sawina video an tichhuak leh.

IS hian Japan mi an hren zinga pakhat, Haruna Yukawa chu an that tawh tih an sawi a, video-ah hian an mi hren pakhat zawk Kenji Goto chu tihlan a ni. Video-ah hian Goto hi Yukawa-a ruang thlalak nia hriat kentir a ni. Video thar hi Japan-in a enfiah mek a, Prime Minister Shinzo Abe chuan Kenji Goto chu chhuah turin a phut.

Firfiak pawl hian kar kalta Thawhlehni Japan mi pahnihte tlanchhuahna atan darkar 72 chhungin dollar matkaduai 200 pe turin Japan sorkar an phut tih an sawi a, an hun tiam chhunga pek an nih loh chuan tihhlumah an lo vau tawh a ni.

Video tihchhuah tharah hian IS hian Goto hi an thil phut thar an sawitir a, IS hian Goto hi Jordan-a an member tang mek, Sajida al-Rishawi nena inthleng turin an phut.

Japan PM Abe chuan firfiakte lakah an tlawm mai dawn lo tih sawiin, Yukawa thah a ni chu a dem thu leh, Goto chu tina loa chhuah nghal tura a phut thu a sawi. US President Barack Obama pawhin US chuan IS-te'n rawng taka Japan mi Haruna Yukawa an that chu a dem thu a sawi.