Zambia President thlanah rorellai candidate a chak

Zambia ram President thlanna neih zawh takah rorellai Patriotic Front (PF) candidate, Edgar Lungu chu a chak.

Electoral Commission of Zambia (ECZ) chuan inthlan result hi a puang a, PF candidate Edgar Lungu hian vote tla aṭangin 48.33% a hmu a, amah hnaih bertu United Party for National Development (UPND) candidate Hakainde Hichilema chuan 46.67% a hmu.

Lungu hi Defence and Justice Minister ṭang lai a ni a, vote 807,925 a hmu a, Hichilema hian vote 780,168 hmuin an in­thlauhna hi 27,757 a ni.

Zambia President thlannaah hian vote a tla ṭha lo hle a, vote nei mi maktaduai 5.1 aṭangin mi 1,671,662 in vote an thlak a, vote tla zat hi 32.35% chauh a tling pha.

Rorellai party chuan inthlan hi langtlang taka kalpuiin, mipuite duh­thlan ngei a ni tih a sawi a, mahse eptu lam chuan inthlan kalpui dan chu a dik lo tih an sawi thung.

President thlannaah hian candidate 11 an awm a, khaw chin ṭha tawk lo avangin inthlanna hmanrua lakna leh staff-te kal kualna thlengin harsatna a siam a, hei vang hian vote thlak hun hi ni thum chhung pawhsei a ngaih phah a ni.

President atana thlan thar Lungu hi kum 58 a ni a, a term hmang zo hman loa nikum October thlaa London-a thi, President hlui Michael Sata ai a awh ang. Nimin khan Zambia President parukna atan lakluh nghal a ni.