Politics khel thei lo turin Thailand PM hlui hrem

Thailand Prime Minister hlui Yingluck Shinwatra-i chu National Legislative Assembly (NLA) chuan ram phatsantua puhin, kum nga chhung politics khel thei lo tura hrem a ni. Hei bakah hian criminal charge siamsak a ni bawk a, thiam loh chantir a nih chuan kum 10 thleng lung in tantir theih a ni ang.

Nikum May thlaa sipai sorkar a din hnuah, PM hlui Yingluck-i hi rice subsidy scheme a kalpui danah a chungchang hi ngaihtuah a ni. He scheme hnuaiah hian Yingluck-i kaihhruai sorkar hian loneitute hnen aṭangin buhfai market price aia a leta sangin a leisak a, sorkarin sum tam tak a hloh phah a ni.

PM hlui chuan thiam loh chantir a nih chungchang hi sawiin, "Thailand ramah chuan dan hmanga rorelna leh democracy a thi ta a ni, he thil hi min tihchhiat tumna a ni," a ti. Expert ṭhenkhat pawhin NLA-a vote lak a ni hi Shinawatra chhungkua politics aṭanga paihchhuah tumna nia an ngaih thu an sawi bawk.