Bus beihnaa mawhphurtuah Bangladesh eptu hruaitu puh

Bangladesh police-te chuan eptu pawl, Bangladesh Nationalist Party (BNP) hruaitu Khaleda Zia chu petrol bomb hmanga passenger bus beihnaa a mawhphurtuah an puh.

Kar kalta Zirtpawnia khualzin phur bus beihnaah mi 29 in hliam na tak an tuar a, an zinga pakua-te chu an an din­hmun a ṭha lo hle.

Thuneitute chuan BNP hotu hian an party-in in­thlanpui buatsaih an phutna lantira Dhaka kawngpui an dannaah, bus bei turin an party mi leh sate thu a pe niin an sawi.

Dhaka Superintendent of Police, Habibur Rahman chuan Khaleda Zia hi thubuai siamsak a nih thu a sawi a, hetihlai hian BNP senior leader Rizvi Ahmed chuan Khaleda an puhna chu thu dik lo a ni, a ti. BNP hian kumin January 6 aṭang khan Prime Minister Sheikh Hasina kaihhruai sorkar chu inthlanpui buatsaih tura nawrin, Dhaka-ah kawngpui an dang a ni. BNP hian kum 2014-a inthlanpui an neih chu an lo boycott tawh bawk.

Eptute'n nawrh an huaihawt aṭangin an mi leh sa eng emaw zat chu man an ni tawh a, buaina chhuak vangin mi 34 an thi tawh bawk. US, EU leh Bri­tain chuan Bangladesh rama party te chu boruak ṭha a awm theihna tura inbiakna nei turin an ngen.