UN hotuin Ukraine-a helho pawikhawihna dem

United Nations Secretary-General Ban Ki-moon chuan Ukraine laka aṭanga inlakhran duha helte'n sorkar kuta awm, Mariupol lawngchawlh hmun rocket hmanga an bei chu a dem thu a sawi.

Kar kalta Inrinni khan Russia thlawp, Ukraine helte hian Mariupol hi rocket hmangin nasa takin an bei leh a, mi 300 an thih bakah midang za chuangin hliam an tuar. Mariupol lawngchawlh hmun hi hmun pawimawh tak, helpawlte awmna bial leh Russia kuta in­chhunglut, Crimea bial inkalpawh theihna a ni.

Ban chuan Mariupol khua beih a ni chu a dem thu thuchhuah siamin a tarlang a, rocket hi civil mite chenna bialah pawng kah a ni a, hei hi international humanitarian law palzutna a ni, a ti. UN hotu chuan helpawlte'n Ukraine sorkar nena inkahhai an puan an bawhchhia chu a dem thu a sawi bawk.

Ukraine ram aṭanga inlakhran tumte sorkar laka an hel vanga tualchhung buaina thlengah mi 5,000 chuang an thi tawh.

European Union (EU)-a foreign policy hotu Federica Mogherini chuan Ukraine tualchhung buaina chungchang ngaihtuah­in Ningani hian ministerial meeting koh a tum tih a sawi. Mogherini-i chuan, "Foreign Affairs Council meeting ka ko dawn a, hetah hian Ukraine ram buaina thleng mek chung­changte sawi hoin, tualchhung buaina tihreh a nih theih dan turte kan ngaihtuah ang," a ti.