Beirut-a restaurant 2,060 leh hotel 163 chhia

Lebanon khawpui, Beirut-a August 4-a lawng chawlhna hmuna thil puak na tak thleng chungchang chu chhui zui mek a ni a, he thil puak hian khawpui chhunga restaurant 2,060 leh hotel 163-te chu a tichhe tel tih nimin khan puan a ni. 

Syndicate of Hotels Owner president, Pierre Ashkar chuan nimin khan hotel leh restaurant chhe zat hi puangin, heng bakah hian hotel tam tak chu dan pangngai anga inhawng thei loin an la awm tih a sawi bawk. Hotel chhiate thawm ṭhatna atan hian sum tam tham tak a ngai dawn a, eng ang zat chiah nge ngai dawn tih erawh hriat chian a la har thu a sawi. 

Ashkar chuan chhiatna thleng vang hian tourism sector bikah hnathawk zinga a zahve dawn chuan an hna an chan phah a ni, a ti. United Nations humanitarian affiars office (OCHA) chuan Beirut-a thil puak hian khawpui chhunga hospital lian paruk, health clinic 20 leh school 120 a tichhia tih a sawi bawk. Mi nuai thum velin chenna in an chan bawk.

Beirut lawng chawlhna hmuna chhiatna thlen dan chhui chiang tur hian judge Fadi Sawan ruat a ni. Kum 60 mi Sawan hi kum 2009 aṭang khan Military Courd judge a ni a, a hmain Baabda-ah investigative judge a ni tawh bawk a ni. Judge hian kar liam ta aṭang khan hna thawk nghalin, thil puak thleng kaihhnawiha hrem tawk official 25-te chu thu a zawtfiah tawh a, Customs chief Badri Daher, port director Hassan Koraytem, Beirut Port Authority director Hanna Fares,  Manifest Department director Neameh Al-Brax, leh engineer Nayla Hajj te manna tur thupek a tichhuak tawh a ni.

Sawan hian finance leh public works minister-te pawh thu a zawtfiah dawn a, an hnaah inthlahdah leh thil dik tawk lo tia a hmuh chuan high council lamah a thlen leh thei ang. Mahse hemi atan hian Parliament member hmun thuma ṭhena hmun hnihten an pawmpui a ngaih dawn avangin a hna hi a hautak hle dawn a ni.