Myanmar : Sipai sorkar leh helpawlten ni li chhung inkahhai puan remti

Myanmar-a hnam tenau zawk ralthuam cheleka ṭangrualte chuan Pathianni khan thuchhuah siamin, sipai sorkar nen Shan state hmar lamah ni li chhung inkahhai puan an remti tih an tarlang.

Hnam tenau ṭangrual, sipai sorkar nena inbei ṭhinte hian Shan state-a China kalpawhna kawngpui pawimawh tak an lak hnuah inkahhai neih lailawk an remtih thu hi an puang a ni. Shan state-ah hian thla hmasa tawp lam aṭang khan sipai sorkar leh anmahni dotute hi an inbei ngawrh hle a ni. Three Brotherhood Alliance (TBA) tia hriat, hnam tenau ṭangrual pawl hian Yunnan province, China kalpawhna kawng pawimawh tak lak ngei tumin sipai sorkar lakah hian beihpui an thlak ngawrh hle a, tun hnai mai khan helai kawngpui hi an thuhnuaiah an dah thei ta a, hemi hnu hian inkahhai neih pawh an remti ta a ni.

TBA-ah hian pawl pathum- Arakan Army (AA), Myanmar National Democratic Alliance Army (MNDAA) leh Ta’ang National Liberation Army (TNLA) te an thawk ho a, heng pawlte hian kumin January thlaa China kaihhruaina hnuaia beihpui thlak lo tura an lo inremsiam tawhna chu bawhchhiain Shan state-ah hian beihpui an thlak a ni.

TNLA Major-General, Tar Bhone Kyaw chuan ni li chhung inkahhai an puan hi China ngenna an zah vang leh anmahni an thlawp vang a ni, tih a sawi. He inremna hian July 14 aṭanga 18 thleng a awh dawn a, Shan state hmarlam depa awm Mandalay erawh a huam tel lo thung ang. Mandalay-ah hian TBA mi leh sa dangte leh helpawl dangten sipai sorkar chu an bei mek tih Kyaw chuan a sawi bawk.