Trump thah tumna kawngah midangin Crooks an pui lo : FBI

US president hlui Donald Trump that tuma beih a nih chungchang chu chhuizui zel niin, Federal Bureau of Investigation (FBI) chuan Trump kaptu Thomas Matthew Crooks chuan midang puihna a dawng lo nia a lan thu an tarlang.

FBI National Security Branch-a executive assistant director, Robert Wells chuan thil thleng an chhuichian tawh chinah Crooks hian thurualpui dang nei loa amah chauha Trump thah tum nia a lan thu a sawi. Hemi rual hian thutawp erawh an la siam lo a, hnuchhui hna chu la chhunzawm zel tur a nih thu a sawi bawk. FBI chuan he thil thleng hi a ruka inthah tumna ang leh firfiaka chetna angin thubuai an kalpui tih a sawi. Wells chuan FBI hnuaia counter-terrorism division leh criminal division te chuan inkahna thlen chhan hriat tumin an bei mek tih a sawi bawk.

FBI Director Christopher Wray chuan Trump kaptu chu thi tawh mah se hnuchhui hna chu kalpui a la ni reng tih sawiin, heng avang hian thil sawi theih chin a tlem rih hle a ni, a ti. Wray chuan inkahna thleng chu mipui sorkar leh a kalphung beihna a ni ber a ni, tiin a sawi bawk. FBI hian Trump kaptu hi rilru lama harsatna nei nia an hriat loh bakah tharum thawh tumna leh invauna lam hawi thusawi a neih an la hre lo tih an tarlang.

Law enforcement official pahnih, an hming tarlan lohte chuan Associated Press hnenah Trump kaptu nia rinhlelh, Crooks-a inchhung leh a lirtheiah bomb siamna hmanrua an hmuchhuak tih an sawi. Trump kah nana a hman, semi automatic AR-15 style rifle hi Crooks-a pain thla ruk liam taa a lei nia a lan thu an sawi bawk. He rifle hi US-a silai lar pawl tak niin, inpawngkahna thleng ṭhinah pawh pawikhawihtuten an hman fo nia sawi a ni. Military style weapon niin, a man a to lo a, hman a awlsam bawk niin an sawi.