Pakistan sorkarin Imran Khan party PTI dan pawnah hnawl tum

Pakistan sorkar chuan an ram prime minister hlui, jail-a tang mek Imran Khan-a party, Pakistan Terheek-e-Insaf (PTI) chu hnawl/khap tum a nih thu a puang.

Supreme Court-in PTI hi national leh provincial assembly-a reserved seat-ah share neih a phalsak thu a puan hnuah, nimin khan information minister Atta Tarar chuan PTI hnawl tum a nih thu hi a puang zui ve nghal a ni.

Minister chuan, "Sorkar chuan finfiahna ṭha tak tak a hmuh hnuah PTI hi hnawl a tum ta a ni. He party hnawlna tur hian case pawh kan kalpui ang," a ti. Nikuma an rama tharum thawhna thleng nasa tak leh sorkar thuruk pawimawh a putruk chungchangah PTI chu mawhphurtuah a puh.

Tarar chuan PTI hnawlna tur hi Supreme Court-ah an thlen dawn tih a sawi a, Imran Khan bakah a party senior leader pahnih - president hlui Arif Alvi leh deputy speaker hlui Qasim Suri te lakah ram phatsan leh sorkar laka hela puhna thubuai siamsak an tum thu a sawi bawk.

Kum 71 mi, Khan hian kum 1996 khan PTI hi a din a, 2018-ah sorkarna an siam a ni. Imran Khan hi 2018-2002 chhung khan Pakistan prime minister a ni a, mahse Pakistan politics lama huhang lian tak nei, sipai lam nena an inlungrual theih loh hnuah, no-confidence vote hmangin PM a nihna aṭang hian paihthlak a ni. PM aṭanga paihthlak a nih hnuah thubuai tam tham tak siamsak a ni tawh a, a thubuai eng emaw zatah thiam loh chantir a ni tawh bawk a ni. Eiruk thubuaia thiam loh chantir a nih avangin kumin February-a inthlanah pawh khan a chuh ve phalsak a ni lo. Heti chung hian he inthlanah hian PTI hian party angin seat a la hnem ber a, sorkar erawh a siam pha ta lo a ni.