Kim Jong-un Nikhaw hre loin a awm

North Korea hotupa Kim Jong-un chu nikhaw hre loin a awm a, a farnu Kim Yo-jong chuan ram inrelbawlna enkawl hna a thawk mek nia sawi a ni. 

South Korea president hlui Kim Dae-ung hnuaia political affairs secretary hna thawk ṭhin, Chang Song-min chuan nimin khan social media lamah Kim Jong-un hi nikhaw hre loa a awm thu a sawi a, hemi rual hian a thih mai erawh a rinawm loh niin a sawi. Heng thu hi China lam aṭanga a hriat niin a sawi bawk. Chang Song-min chuan "North Korea hotuin a thuneihna midang hnenah a hlan ngawt thiang lo a, a lal duh tawh lo emaw phiar rukna avanga paihthlak a nih chauhin emaw a thuneihna leh ram enkawlnate chu midangte a hlan ṭhin a ni," a ti. 

SKorea chanchinbu pakhat chuan Kim hian a rukin an ram inrelbawlna hna thawk rih turin mi dang a ruat thu a tarlang a, chanchinbumi tam tak chuan Kim hi a hriselna a ṭhat loh thu an tarlang fo bawk. Kumin April 11 khan Kim hian Workers’ Party politburo meeting chu a kaihruai a, hemi hnu May 2 khan an rama Sunchon khuaa fertilizer factory hawnna inkhawmah red ribbon a chep bung tih, an ram media Korean Central News Agency (KCNA) chuan a tarlang. Hei bakah hian August 5 khan North Korea-a rorellai, Workers' Party of Korea (WPK) chuan Central Committee an nei a, he meeting hi an ram hotupa Kim Jong Un chuan a kaihruai tih media-te chuan an tarlang bawk. Mahse Chang chuan tun hnaia NKorea lamin Kim telna leh a thlalak an tihchhuahte hi siamchawp vek niin a sawi thung. 

Kumin kum tir lam aṭang tawh khan Kim hi a hriselna a ṭha lo hle a, a thi nia sawi hialte pawh a awm. Mahse NKorea lam hian a hriselna chungchangah thuchhuah engmah an neih ngai loh avangin Kim hi a dam ṭhat leh ṭhat loh chungchangah thuchiang engmah hriat theih a ni lo.