Kurdish sipaite'n Kobane khawpui hmun tam zawk an la let

Kurdish sipaite chuan Islamist State (IS) firfiak­te kut aṭangin Syria rama Kobane khawpui hmun tam zawk an la let tawh a, khawpui 90% vel chu Kurdish sipai kutah a awm tawh tiin US Central Command chuan a sawi.

IS te hian Syria leh Iraq ramah hmun zau tak an la tawh a, Syria leh Turrkey inri-na bula khaw pawimawh tak Kobane pawh lak tumin an mi leh sa ṭhahnem tak bakah ralthuamte an dah lut.

America sipaite chuan Kurdish sipaite hi thlawpin, thlawhtheihna hmangin IS lakah beihpui an lo thlakpui reng bawk.

Kurdish sipaite hian IS firfiakte nena hun rei tak an inbeih hnuin Thawh-ṭanni khan khawpui pawn­a tlangah ISS banner intar chu la thlain, an flag an zar a ni. Syrian Observatory for Human Rights leh Kobane-a Syrian activist Farhad Shami chuan IS member-te chu khawpui chhung aṭang­in umchhuah an ni vek tawh a, tlem a zawng chu khawpui khaw­chhak lam daiah Kurdish sipaite nen an la inkap niin a sawi.

Nikum September thla khan IS firfiakte hian Kobane chhehvela thingtlang khaw 300 chu lain, khawpui an bei zui a, khawpui chhung hmun zahve vel chu an thunun hman a ni. Kobane-a inbeihna thleng vangin mi sang tel chu an ram ṭhenawm, Turkey ramah an tlan­chhe tawh bawk.