Vur thli tleh nasat vangin NY-ah emergency an puang

New York state-ah vur thli a tleh nasat vang­in khawpui leh a chhehvel bialah state of emergency puan a ni.

National Weather Service chuan khawpuiah hian Thawhṭanni tlai dar 1 aṭanga Nilaini zing thlengin vur thli hi a tleh dawn tih a lo sawilawk tawh a, thli hi darkar khat­ah mel 20-30 a nain a tleh a, hei aia na pawh hian a tleh mai thei an ti. Vur tla chhah lam hi inches 18-24 a tling bawk.

New York State Governor Andrew Cuomo chuan state of emergency puangin, hnathawktute chu darkar 24 chhung duty-in, power khaihlak tur laka invenna turte pawh an buatsaih a ni, a ti.

Khawpui chhunga chengte chu khawpui tana free emergency notification system, Notify NYC a inziak lut vek tura ngen an ni. Notify NYC hmang hian New York-a chengte chuan khawchin awm dan leh emergency thilah phone call, text message leh email alert te an dawng thei dawn a ni.